Angika Kavita | अंगिका कविता
बाल कविता | Bal Kavita
अंजनी कुमार शर्मा| Anjani Kumar Sharma
रिक्सा आगू खाड़ो छै
नुनुआ अभी उघाड़ो छै
भूतलैलो छै अंगा टाय
थरिया ले के आवै माय
नुनुआ गिलै दन दन दन
घंटी बाजै टन टन टन
कान्हो में बस्ता लटकैनै
सोझो होय छै रिक्सा इन्ने
रिक्सा सौसे शहर नचावै
नुनुआ सिनी उधम मचावै
भागै रिक्सा सन सन सन
घंटी बाजै टन टन टन
सांसो फुलै देखी बस्ता
रैला में नापै छै रस्ता
उबड़ खाबड़ कछुआ चाल
हाल होलै सबके बेहाल
जाम लगै छै क्षण क्षण क्षण
घंटी बाजै टन टन टन
खत्म करै छै रोजे पोथा
गढ़ै जेना मौगी मोथा
अनटेटलो सब बात बनावै
हिसाबो में नेटा बहावै
बात बात में झन झन झन
घंटी बाजै टन टन टन
भकुवैलो घर आवै बौआ
पट रहै छै वोकरो पौवा
छिड़यावै सब कपड़ा लत्ता
गिदनावै तब कागज गत्ता
सिकचिल्ली छै कन कन कन
घंटी बाजै टन टन टन
अंजनी कुमार शर्मा
No comments:
Post a Comment