बगरो | Angika Kavita | Bagro | अंगिका कविता | by कुंदन अमिताभ | Kundan Amitabh

Angika Kavita | अंगिका कविता
बगरो | Bagro
by कुंदन अमिताभ  | Kundan Amitabh

बिना हाथ के चोंचॊ सॆ ही
तिनका-तिनका चूनै छी
चीं-चीं चीं-चीं करी करी कॆ
आपनॊ घर कॆ बूनै छी

हमरॊ शरीर बड्डी छोटॊ
पैखना पर भी ओछॊ छींटॊ
गोर करै छै डगमग डगमग
गरदा सॆं दाना चूनै छी
चीं-चीं चीं-चीं करी करी कॆ
आपनॊ घर कॆ बूनै छी

नै हमरा खेत खलिहान
नै कोनॊ कोठी - गोदाम
रोजाना ही घुमी घुमी कॆ
पेटॊ मॆं दाना सैतै छी
चीं-चीं चीं-चीं करी करी कॆ
आपनॊ घर कॆ बूनै छी

साथी पंछी उड़ी उड़ी कॆ
परदेशॊ मॆं घूमै छै
हम्में बगरॊ रही सही कॆं
गामॊ के ढग्घर ही घूमै छी
चीं-चीं चीं-चीं करी करी कॆ
आपनॊ घर कॆ बूनै छी

फुदकतॆं रहना भल्लॊ लगै छै
चहकतॆं रहना हौला लगै छै
बंद कोठरी कॆ छोड़ी करी कॆ
आजादी कॆ ही चुनै छी
चीं-चीं चीं-चीं करी करी कॆ
आपनॊ घर कॆ बूनै छी

Angika Kavita | अंगिका कविता
बगरो | Bagro
by कुंदन अमिताभ  | Kundan Amitabh

Angika Poetry : Bagro
Poetry from Angika Poetry Book : Sarang
Poet : Kundan Amitabh
Please visit  angika.com  for more Angika language Poetry